Carw yn ôl gyda sengl ‘Lanterns’ allan Mai 25, ac albwm newydd

Gwreiddiau curiadol, tincian tecno atgofus a lleisiau rhithiol gan ddewin alawon mwyaf dirgel Cymru…

Ffurfiwyd ble cyrddai tir a dyfroedd moryd, a sgrech y ddinas ond tafliad carreg o natur, mae Carw, y canwr-gyfansoddwr o Gaerdydd, yn rhoi rhagflas o fawredd ei albwm gyntaf, a fydd allan yn yr Haf, gyda’r sengl LANTERNS, a ryddhawyd ar Recordiau BLINC ar Ddydd Gwener, Mai 25, 2018.

Mae Carw yn agor y drws ar brosiect hunan-ysgogedig ac yn bennaf hunan-gynyrchiedig, sydd yn dwyn dylanwad gan bop electronaidd yr 1980au, y bydoedd breuddwydiol yng ngitarau’r Cocteau Twins a churiadau machlud haul Balearic House. Wedi ei glymu yng nghymuned cerddorol y brif ddinas, mae gweledigaeth creadigol Carw wedi peri iddo ddewis a dethol dylanwad natur yn dilyn ei fagwraeth yng nghefn gwlad Canolbarth Cymru, yn cyfuno anadlau dyfnion o aer glân gyda llwch bwrlwm y ddinas.

O dan ei enw iawn Owain Griffiths, mae Carw wedi cyweithio a pherfformio fel rhan o Cotton Wolf, Eugene Capper & Rhodri Brooks, Winter Villains a’r triawd synth electronaidd Hlemma, yn ogystal ag arwain y band poblogaidd Violas. Cafodd LANTERNS ac albwm newydd Carw ei gyd-gynhyrchu gan Llion Robertson o Cotton Wolf.

Yn seiliedig yng Ngogledd Cymru ac ar flaen cad cerddoriaeth gyfoes Cymreig a Chymraeg, bydd Recordiau BLINC yn rhyddhau albwm gyntaf Carw yn Haf 2018, yn dilyn cynnyrch blaenorol gan HMS Morris, a enwebwyd ar gyfer Gwobr Gerddoriaeth Gymreig 2017, Rogue Jones ac OSHH.

Bydd LANTERNS ar gael o’r prif wasanaethau digidol megis iTunes, Spotify, Apple Music, a.y.b. Mwy o fanylion i ddilyn…